Худалдаа хөгжлийн банкны хууль бус хуйвалдаан

Т.Алтансүх | Yazguur.mn
2021/10/25

Худалдаа хөгжлийн банк нэгэн иргэний нэр дээрх үл хөдлөх хөрөнгийн зээлийг өөрсдөд ашигтайгаар эргүүлсэн тухай мэдээллийг дор онцлох гэж байна.

Тодруулбал, иргэдэд шалгуур өндөртэй олддог ипотекийн 6 хувийн хүүтэй зээлийг өөрийн үйлчлүүлэгчдээ мэдэгдэхгүйгээр авч, дундаас нь хүүгийн ашиг хүртдэг байсан нь илрээд байна. Өөрөөр хэлбэл, иргэнээс орон сууцны зээлийн хүүг 16 хувиар тооцож авч байсан хэрнээ тухайн иргэний үл хөдлөх хөрөнгийг өөрт нь мэдэгдэлгүй 6 хувийн хүүтэй зээлд оруулчихсан байсан хэрэг. Дунд нь үүсч буй хүүгийн зөрүүн дээр өөрсдөө ашиг олж байсан гэх энэхүү луйврыг яг хэзээнээс хичнээн иргэн дээр авч хэрэгжүүлснийг тааварлашгүй. Олон жилийн өмнөөс өндөр хүүтэй зээл авсан ч түүнийгээ 6 хувийн зээлд хамрагдуулж чадахгүй байгаа иргэд өөрсдийн зээлийг дахин нэг нягтлаад үзэхэд гэмгүй л байх.  Худалдаа хөгжлийн банкны тухайд энэ асуудалд тоймтой хариу өгөөгүй байна. Ямартаа ч хүүлэгч Худалдаа хөгжлийн банкийг хяналтандаа авч, шалгалт оруулахыг Хуульзүйн яам хийгээд Монгол банкнаас зарим иргэд шаардаж эхэллээ.

Хохирсон гэх БГД-ийн 17-х хорооны иргэн Г.Сэржхоролын мэдэгдэл бүрэн эхээрээ:

БАНК-ОРОН СУУЦ-ЛУЙВАР 

11 жилийн өмнө ХХБ-тай орон сууцны зээлийн гэрээ хийж 100 сая-н зээлтэй 94м2 байранд орж байв.

Тэр үед ипотекын 8%, 6% ОСК, МИК сураггүй байсан л даа, энгийн жилийн 16% хүүтэй зээлээр авсан юм.

Энэ хугацаанд нийт зөвхөн хүүнд 146 сая орчим төгрөг төлж үндсэн зээлээс 25 хүрэхгүй сая төг хасагдсан байдаг.

Жилийн 6%, 8% төлж байгаа ипотект хамрагдсан хүмүүст бараг л атаархдаг байв, нугалсан өндөр хүү төлдөг учраас .

Манайх яаж ч хичээгээд ипотект хамрагдах боломжгүй, учир нь дээд хязгаар нь гээд 80м2 дотор л хамрагдах журамтай учир.

Ингэж явсаар 10 сарын 10-нд зээлээ хаалгаж байраа зарах болов оо.

Хамаг зүйл энэ өдөр эхэлсэн. Зээлээ хаалгаж хамаг хүүгээ ковидын хойшлуулсантай нь төлж гэрчилгээгээ аваад нотариат дээр очтол таны орон сууц давхар Монголын Ипотекийн Корпораци дээр зээлийн бүртгэлтэй байна гэх нь тэр ээ.

Тийм байх учиргүй, энэ байр маань ипотекийн зээлийн журам шаардлагаас хэтэрсэн лимиттэй учир оролдоод ч нэмэргүй байсан юм гэж учирлав.

Үл хөдлөх дээр очлоо, бас л таны байр ипотект бүртгэлтэй байна!!! гэв.

Учрыг нь олохоор эргээд баяртай гээд гарсан ХХБанкандаа хандлаа...Дүлэгнээд тоймтой юм хэлээгүй ч бид хурдхан МИК (Ипотекээс) -с хасуулаад өгье гэвэй

ХХБ-ны төв банканд нь очиж хэрэглэгч хариуцсан хэлтсийн даргатай нь уулзав, бүх зүйл тодорхой боллоо.

2017 онд миний нэрээр миний үл хөдлөх хөрөнгийг барьцаалж (мэдээж надад хэлэлгүйгээр) МИК-с 6% хүүтэй ипотекийн зээл авчихсан хэрэг.

Одоо танд нэг зүйл анзаарагдаж байна уу, иргэнд хэлэлгүйгээр иргэнд олдох боломжгүй орон сууцны зээлийг (төрөөс ипотекийн зээл 80м2 хүртэлх гээд хатуу заачихсан, харин минийх 94м2) хувийн банк санхүүжилт босгох зорилгоор төрөөс хусчихсан хэрэг!

Би яг энийг бол ХУЙВАЛДААН гэж хардаж байна! Эхний хууль бус үйлдэл нь энэ.

Хоёр дахь нь, ХХБ надаас болохоор орон сууцны зээлийн хүүнд 16% олон жилийн турш хүүлсэн, харин надаас нууцаар Монголын Ипотекийн Корпорациас 6%. Зөрүү 10%-г хууль бусаар ямарч байсан 4 жилийн турш луйварджээ гэж хардаж байна.

Миний буруу нь гэнэт зээлээ хааж үүнийг нь мэдчихсэн, тэдний алдаа нь намайг гэнэт зээлээ хаана гэж тооцоолоогүй байсан байх. Аймаар уу??, хамгийн аймаар зүйл бол надаас өөр хэдэн мянган зээлдэгч өөрийн нэрээр төрийн мөнгийг хувийн банканд нууцаар санхүүжүүлж, мөн давхар хүүлүүлж суугаагаа мэдэхгүй байж магадгүй явдал! Хэдэн арван тэрбумын ажил болно байх.

Энэ бол ганц нэг банкны захирал хийчих зүйл гэж бодохгүй байна. ХХБ, Ипотекийн корпораци, Монголбанкнаас ч хүмүүс оролцсон байх гэж хардаж байна.

Иймд дахин олон жил, өөр олон иргэн энэ мэт хууль бус хүүлүүлэхгүйн үүднээс яг энэ асуудлыг эхнээс нь ул суурьтай шалгаж хариу ирүүлнэ үү гэж Санхүүгийн Зохицуулах Хороо-нд албан ёсоор хандаж байна. Мөн Хууль зүй, дотоод хэргийн яам-ны авилгын эсрэг хороо анхааралдаа аваасай гэж хүсч байна. Монголбанк /Монгол Улсын Төв банк/ үүнийг хянаад хариу өгнө үү гэж хүсч байна.

Мөн хэвлэл мэдээллийн байгууллагууд анхаарч сурвалжлаасай гэж хүсч байна

Эцэст нь Худалдаа хөгжлийн банк / Trade and Development Bank-аас албан ёсны тайлбар шаардаж байна!



Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна